Hundurinn minn Kítara er farin í sveitina. Baldur á Vattarnesi tók hana að sér og er hún núna hálsólarlaus sveitahundur. Það verður skrýtið að hafa hana ekki til að hamast í.

Ég er svo duglegur. Núna tek ég td alltaf stólinn sem er inni á baði (gamall trékollur) færi hann að vaskinum, príla upp á hann, og vil tannbursta mig sjálfur. Svo er auðvitað bónus að sulla smá í vatninu líka.

ég er rosalega duglegur á leikskólanum. Leik mér mikið, duglegur að vera úti, og er iðulega allur úti í sandi þegar ég kem heim. Krakkarnir eru svo góðir við mig. Ég er bara með eldri krökkum og Hartmanni vini mínum. Þau eru svo dugleg að kenna mér hluti.

Hörður afi er kominn aftur austur. Gaman að hitta hann svona oft. Hann gisti hjá okkur um daginn, svo núna er hann í Hvammi, go er að vinna hann undir sölu. Við kíktum aðeins á hann á sunnudaginn, og hann er enn með svo flottar hænur. Ég vildi helst bara fara inn í kofann og leika við þær :o)

Og enn ein tönnin er að koma. Þá er ég kominn með 14 tennur :o) Enda er kjötið ekkert mál núna!!
Eigið góðan dag
Ykkar Gabríel Alexander

Halló halló allir nær og fjær!
Alveg rosalega góð helgin okkar. Mamma og pabbi voru sama og ekkert í tölvunum, við lékum okkur alla helgina, fórum í bíltúra, grillpartý, kosningarpartý, ég fékk fullt af nammigotti - ss pylsum, pönnsum og svölum.
Svo fluttu mamma go pabbi tölvurnar sínar upp á 3ju hæð. Þar er sko skemmtilegt að vera, miklu meira rými þar til að hlaupa um. Pabbi er alveg að verða búinn með hæðina, svona dútl eftir eins og hann kallar það. Ég get meira að segja labbað sjalfur upp tröppurnar.

Ég er svo stór strákur að ég sit við eldhúsborðið go lita með litunum mínum. Það er afskaplega gaman, og síminn hans pabba er núna "pabba sa"

Og haldiði að mamma go pabbi hafi ekki klippt mig !!! tóku bara allt hárið mitt af - semst ekki síðhærður tölvunörd lengur... mamma segir ég sé svo mikill knúsustrákur. Ég er náttla bara yndislegur í alla staði, lang flottastur - mamma segir það og pabbi minn, og afarnir mínir og ömmurnar mínar og þau hafa alltaf rétt fyrir sér.

Halló halló !
Takk kærlega fyrir heimsóknirnar á síðuna mína og gaman að fá svona skemmtileg kvitt í gestabókina, mamma var himinlifandi yfir þessu öllu saman.
Um daginn var afskaplega gott veður. Sól og sumar, en núna lítur allt öðruvísi út. Kalt og hvasst. Samt fæ ég hrós af fóstrunum mínum á leikskólanum þar sem ég er rosalega duglegur úti. Áður fyrr átti ég nefnilega til að hlaupa alltaf inn aftur, og þær á eftir mér. Þá bara vildi ég ekki vera úti. En núna kem ég heim með grasgrænu í gallanum og búin að smakka á sandinum í sandkassanum. Hann skilar sér svo vel og innilega í bleyjunni minni daginn eftir. Mamma jésúsaði sig fyrst, en heyrði svo hjá reyndari mæðum að þetta væri bara allt fyllilega eðlilegt.

Guðmundur langafi minn átti afmæli í gær. Hann varð áttræður kallinn og er úti á Benidorm að hafa það gott. Elsku afi minn til hamingju með afmælið! Hlakka til að sjá ykkur í sumar!
Svo áttu Guddú og Viddi - Guddú er afasystir mín, þau áttu 30 ára brúðkaupsafmæli í gær líka!! Og þau eru á Benidorm í tilefni þessa tveggja afmæla - rosalega held ég að það hefði nú verið gaman og notalegt að vera þar líka.

En svona lítil ísmynd verður bara að minna okkur á að sumarið er komið á dagatalinu.
Hafið það gott,
Ykkar Gabríel Alexander

Góðan daginn :o)
mamma mín er sko montin af mér núna go pabbi minn líka. Ég er sko búin að gera fyrstu listaverkin mín, og foreldrar mínir eru búnir að pósta þetta um allt internetið go senda myndir af þeim í fullt af smsum út um allt... he he ætli mamma mín heimti ekki að setja ramma utan um þetta go hengja upp? Þetta eru nú fyrstu listaverk sonarins :o)

Sælt veri fólkið.
Mamma heyrði í langaafa og langömmu úti á benidorm um daginn, ég bið kærlega að heilsa þeim. Hlakka svo mikið til að hitta þau í sumar þegar þau flytja aftur í bílinn sinn hjá Rósu ömmu og Valgeir afa í Mývó.
Hörður afi er búinn að vera hérna fyrir austan í nokkra daga, gaman að hitta hann svona oft. Fórum að heimsækja hann á sunnudaginn í Hvamm. Rosalega gott veður. Ég fann drullupoll um leið og mamma leit af mér, og settist strax í hann. Afi á hænur í Hvammi. Fékk að kíkja aðeins inn í kofann og þær eru rosalega flottar, gular og svartar að lit. Þær vildu lítið tala við mig en það stoppaði mig ekki í því að tala fullt og meira við þær.
Núna eru að koma 5 tennur, sú fimmta bættist við í gær. Og ég er farinn að geta borðað alveg sjálfur morgunmatinn minn með skeið, rosalega duglegur. Ég tala og tala og tala, mamma og pabbi skilja orðið mikið af því sem ég reyni að segja þeim. Orðin mamma og pabbi eru fyllilega skýr hjá mér.
Á myndnni er ég að borða svo rooosalega gott brauð með sykurlausri jarðaberjasultu, sem borðast yfirleitt á undan brauðinu :o)

Bið að heilsa ykkur öllum og eigið góðan dag
ykkar Gabríel Alexander

Nú er sko gaman að vera til.
Gubban er hætt, ég get borðað, og það er svooo gott að borða. Pabbi grillaði handa okkur kjúkling og pylsur, fyrsta grillið okkar í sumar. Og mikið var gott að fá grillmat. Ofboðslega gott veður, og búið að taka til í litla garðinum, svona að mestu leiti, mamma þarf að raka saman eftir hundinn, sem hún lofar að gera um helgina, og þá get ég líka farið út að leika þarna.

Mamma mín sótt mig í gær á leikskólann. Þau eru með breyttan opnunartíma og hún vinnur núna frá 9 til 4 á daginn. Og getur þar af leiðandi sótt mig á leikskólann og við getum farið út í labbó með Kítti, eins og við gerðum í gær í góða veðrinu.

Og ef einhverjir vinir og vandamenn verða nálægt okkur á laugardaginn þá erum við með opinn leikskóla á laugardaginn, væri gaman að sýna td öfum og ömmum leikskólann minn.
Eigið góðan dag
ykkar Gabríel Alexander

Halló halló :o)
ég er enn heima í gubbupestinni. Mamma var hjá mér í gær, pabbi varð að halda áfram að vinna uppi og er sú hæð orðin rosalega flott núna.
En ég náði að sofa í nótt almennilega, gubbaði ekkert - svo vonandi er þetta að verða búið. Mamma segir að undirhakan mín sé farin og pabbi talar um að ég sé orðinn fisléttur. Ég hef bara ekkert getað borðað, en svo prufaði mamma að gefa mér eplasvala (m. sykri) og það var það fyrsta sem ég hélt niðri. Og sykur var gott að fá í kroppinn. Epli, rifin niður, eru það sem ég vil borða og Better Choice kex með appelsínubragði.
Vonandi er þetta allt að koma, mamma og pabbi eru allavega vongóð þar sem ég gubbaði ekkert í nótt.
Bið að heilsa öllum, ykkar Gabríel Alexander.

Góðan daginn.
Ég er lasinn, ég er með ælupest. Einhver sem hefur verið að ganga hérna go það er sko ekkert gaman skal ég segja ykkur. Ég held engu niðri og vil bara að það sé haldið á mér. Mamma go pabbi eru þau laaaang bestu í heimi, þrátt fyrir svefnlausar nætur þá hafa þau fullt af orku handa mér, og halda á mér til skiptis. Ég græt af sársauka, en reyni að herða af mér, en stundum er það bara ekki hægt, ég er bara 14 mánaða gamall.
Þetta hlýtur að fara að lagast. Ég er hraustur að eðlisfari, hristi þetta af mér, og fer aftur út að leika.

Loksins loksins ..
Mamma setti inn myndir frá jólunum... (komið fram í mai..) ha ha ha - en loksins getið þið séð jólin mín, fyrstu jólin mín og fyrsta afmælið mitt! Jólamyndir og afmæli.

Halló halló!!
Um helgina var Hörður Már, stóri frændi minn fermdur. Af því tilefni fórum við til Akureyrar og hittum alla fjölskyldu pabba. Rosalega gaman. Mamma og pabbi segja að salurinn hafi ekki verið barnavænn þar sem fullt fullt af stigum var og tröppum, og enginn barnastóll sem þau gátu ólað mig niður í. Ég skemmti mér hins vegar konunglega.
Svo á sunnudag fórum við til akureyrar aftur, þar sem við ætluðum að ræna Gunna frænda með okkur heim. Hann ætlar að hjálpa pabba með rafmagnið. Við mamma fórum með Maríu, konu Gunnars, og dætrum þeirra, Önnu og Elínu á róló. Það var rosalega gaman! Mamma setti inn nokkrar myndir til að leyfa ykkur að sjá!

Halló halló allir saman!
Jamm nú er sko sumar og sól! Ég er búinn að vera duglegur í leikskólanum og er ekki myndahæfur í dag. Með kúlur og skrámur um allt andlit. Alltaf jafn sætur samt sem áður segir mamma mín og knúsar mig. Fór með mömmu og Kítöru út í morgunlabbóinn í gær. Það var rosalega gott veður, og Kítara hljóp um allt, reyndi að fá mig til að kasta fyrir sig hinu ýmsa dóti.
Í kvöld þegar mamma er búin að vinna þá förum við í sveitina, fermingarveisla á morgun hjá Herði, bróðursyni pabba. Hlakka til að hitta alla fyrir norðan.
Pabbi er búinn að vera svo duglegur í húsinu okkar. Við förum alveg að geta notað 3 hæðina, go þá skapast meira pláss. Og ég fæ mitt eigið herbergi - það verður sko fjör, fullt af plássi til að ruslast um allt. Mömmu hlakkar alveg jafn mikið til, því hún vonar að hún fái þá að sofa lengur en til 5-6 á morgnana, þar sem herbergið mitt verður með glugga til suðurs, sólin mun ekki vekja mig.
Eigið góða helgi
Gabríel Alexander

Halló halló !! hvernig finnst ykkur nýja síðan mín!! og meira að segja mamma mín búin að setja inn nýjar myndir af mér!! Kíkkið á hérna!! Og hvernig væri svo að kvitta í gestabókina?

Hæ hæ
12. apríl eignaðist ég litla "frænku" - tja hún er kannski ekki frænka mín þannig, en mamma mín og mamma hennar hafa verið vinkonur síðan þær voru pínu litlar. Þessi glænýja frænka mín heitir Anna Valgerður og er Káradóttir. Hlakka rosaelga til að hitta hana, og vonandi fáum við að grallast saman og prakkarast... ha ha ha en hún er strax komin með heimasíðu sú stutta, á www.barnanet.is Anna Valgerður Káradóttir, sjáið bara hvað hún er mikil krúsa!! Til hamingju með þessa prinsessu, Inga og Kári, og auðvitað skila kveðju til afa Gunnars og Ömmu Vigdísar :o)

Hæ hæ :o)
Páskarnir eru að koma, ég hlakka til að hafa mömmu mína heima hjá mér meira. Hún hefur verið að vinna meira en vanalega því sá sem hún var að vinna með eignaðist litla stelpu, og er í fæðingarorlof og verður það fram í júlí.

Nei - mamma hætti ekki að taka myndir af mér þegar hún fór að vinna.... Þær eru í ferðavélinni sem er í viðgerð á Akureyri, og svo hefur mamma verið bara á fullu við að sinna mér þegar hún kemur heim úr vinnunni. Hún fer vonandi að gera eitthvað í þessum myndamálum.

Ég er að fá 2 jaxla, þokkalegur jaxl ég - en samt er ég voða lítill í mér á næturna og græt af sársauka. Mamma og pabbi hafa því ekki mikið fengið að sofa undanfarið, en þau eru svo góð að þau halda á mér á meðan ég er að komast yfir það versta, þau meira að segja syngja fyrir mig og kúra með mig til að mér líði betur, og þá er allt í lagi.

Leikskólinn er skemmtilegur. Ríma vinkona mömmu og mamma Hartmanns sem er vinur minn, er farin að vinna á Kærabæ, leikskólanum mínum. Svo núna er Hartmann líka eftir hádegi með mér :o) Ég er mikið úti, gaman að drullumalla, renna mér á þotu, og hlaupa um með krökkunum. þau eru rosalega góð við mig, og eru alltaf að knúsast með mig. Ég er náttúrulega svoddan yndi :o)

Svo er planið að fara til afa og ömmu í Mývó um páskana. Hlakka til að fara þangað, leika við ömmu og skápana hennar :o)

Hafið það sem allra allra best yfir páskana.
Gabríel Alexander

Í gær 2. apríl, átti Sunnefa frænka mín afmæli!!!

Til hamingju með daginn kæra Sunnefa - til hamingju með 16 árin þín. Vonandi fáum við nú að hittast í sumar.

Þinn frændi
Gabríel Alexander

Sælt veri fólkið :o)
Þá eru fullt af hlutum búnir að gerast. Bróðir pabba sem var búinn að vera mikið veikur dó 16.mars. Blessuð sé minning hans. Við fórum norður á afmælisdaginn hennar mömmu 23. mars, og gistum hjá afa og ömmu í Mývó.
Ég var rosa duglegur föstudaginn 24. mars því þá var ég einn í passi hjá afa og ömmu á meðan mamma og pabbi fóru á jarðaförina.
Pössunin gekk rosalega vel, ég meira að segja lá alveg kjurr á meðan amma skipti á mér, sem ég geri annars ekki. Það er bara svo gaman hjá þeim. Ég þekki mig orðið svo vel þar.
Svo á laugardaginn hitti ég Hörð afa, Siggu ömmu og Magnús afa, og svo fuuullt af systkinum pabba, sem eru uppeldissystkini hans. Rosalega gaman að hitta allt þetta fólk. Vona að ég fái nú að hitta afana mína og Siggu ömmu oftar.
Í mývó um kvöldið bjó Valgeir afi til mína eigin buslulaug í gömlu Kísiliðjunni. Stór sturtubotn sem afi gat sett tappa í og kveikti svo á 2 sturtum, og ég gat buslað og sullað og hlaupið um. Var alveg rosalega gaman!

Svo fórum við heim á afmælisdegi pabba 26. mars :o) - alltaf gott að koma heim !

Leikskólinn minn gengur mjög vel, og ég var að heyra það áðan að vinkona mömmu, Ríma, mamma Hartmanns er að fara að vinna þar eftir hádegi!! Svo hún verður með mér á daginn - hlakka mikið til :o)

jæja - þá er flensan yfirstaðin. Ég fór til læknis á fimmtudag til að láta hlusta mig, hann var hræddur um að ég væri með þennann hvimleiða 'RS' vírus sem herjar á ungabörn, en svo var ekki, sem betur fer. En ég var lasin go fór ekki á leikskólann.
Um nóttina vaknaði mamma við mig og mældi mig, var ég þá með 39,5°. Hún hringdi á lækni, hann sagði henni að gefa mér stíl, gefa mér nægilega mikið að drekka og setja blautan klút á ennið mitt. Mikið rosalega var það gott. Mömmu og pabba stóð ekki á sama og snérust í kringum mig.
Mér leið afskaplega illa á föstudeginum. Grét og grét, en gat ekki sagt mömmu hvar ég findi til en ég held að hún hafi gert sér grein fyrir að ég væri með haus- og beinverki, og ég skildi bara ekki af hverju hún gat ekki lagað þetta. En hún gaf mér stíl, knúsaði mig og sat með mig og hughreysti mig. Mér leið betur við það.
Núna er ég bara með nebbahor, en þá ákváðu jaxlarnir að gera vart við sig. Ég lít út eins og hamstur! Og ég er svo pirraður út af þeim.

Annars gengur leikskólinn vel. Pabbi er farinn að fara með mig go skilja mig eftir, sækir mig svo kl fimm. Mér finnst orðið gaman þar. Fóstran mín heitir Anna og er mjög yndæl. Hún vekur hjá mér öryggistilfinningu þannig að þó pabbi fari þá er þetta allt í lagi, ég líka veit að pabbi minn kemur alltaf og sækir mig aftur :o)

Leikskólinn er frábær!!
Pabbi fer með mig kl eitt og ég er núna svo stór og flottur að ég er einn til fimm! Fyrst mótmæli ég smá þegar pabbi fer, en mér finnst núna svo gaman að ég sný mér að dótinu og hinum krökkunum og gleymi að vera reiður. Svo þegar pabbi kemur og sækir mig þá fagna ég honum, en held áfram að leika mér.
Ég er farinn að drekka alveg sjálfur úr glasi - þegar ég uppgötvaði að ég yrði að lyfta höndunum hærra til að geta drukkið almennilega þá fór þetta allt að ganga hjá mér!
Ég er allavega hraustur og hress og það er rosalega gaman að vera til. Alltaf hlæjandi og klappa saman lófunum, sérstaklega þegar mamma syngur fyrir mig :o)

Þá er ég búin að fara til Reykjavíkur og koma heim aftur. Ég hitti svo mikið af fólki, og fór á svo marga staði. Mamma flaug með mig til pabba á fimmtudegi, var svaka þægur í vélinni, reyndar pirraðist aðeins þegar ég átti að sitja kyrr. Ég er með 2 heilbrigða fætur sem ég vil nota þegar mér sýnist, og er það nokkuð oft. Það er ekkert skemmtilegt að sitja kjurr á rassinum.

Var mikið í bílnum, þægur en nokkuð pirraður seinnipart daganna sem við vorum í bænum. Megin ástæða ferðarinnar var að hitta bróður pabba sem er mikið veikur. Ég var einmitt að hitta hann í fyrsta skipti.

Við gistum á hóteli, var rosa gaman, var með rúmið mitt meðferðis sem er algjört möst!! Við hefðum verið rukkuð slatta mikið ef við hefðum þurft að leigja rúm af hótelinu undir mig!!

Við keyrðum heim á sunnudag, eða alla leið til afa og ömmu í mývó, þar sem allir voru komnir í vinkil eftir að hafa setið í Yaris alla helgina!! Blikkdósir kallar mamma þetta....

Ég er lasinn. Ég er með gubbupest. Í fyrsta skipti sem ég verð veikur - í vikunni á eftir að ég byrjaði á leikskólanum, ætli það séu einhver samhengi þar á milli?? En ég vona að þetta sé hætt núna, ég gubbaði í nótt, og mamma sat með mig í fanginu til að verða tvö í nótt, því mér var svo óglatt og ég kúgaðist svo mikið. Á endanum var það eina sem ég vildi fá var gamla SMA ungbarnablandan í pelann, og eftir það þá leið mér betur og ég gat sofið í alla nótt. En svo maður lifandi hvað ég var svangur í morgun þegar ég vaknaði.
En ég hef aldrei verið lasinn áður, og ég vona að þetta sé nú að verða búið. Mamma og pabbi eru búin að vera lasin líka, en ekki með gubbuna eins og ég. Þau hafa legið með kvefskít.